Epektibo batok sa Delta variant sang COVID-19 ang tanan nga COVID-19 vaccines nga nalista sa idalom sang World Health Organization (WHO) emergency use.
Ini ang ginpaathag sang isa ka public health expert kadungan sang pag-engganyo sa mga tawo nga magpabakuna agud maproteheran ang lawas batok sa lain-lain nga variant sang virus nga nakasulod na sa Pilipinas.
Suno kay Dr. Philip Ian Padilla, vice chancellor for academic affairs sang University of the Philippines (UP) Visayas, ang vaccines amo ang nagahatag sang mas mataas nga lebel sang antibodies sa lawas sang tawo kag nagaserbe ini nga panagang agud nga indi makahalit ang corona sang SARS-CoV-2 sa baga.
“Bisan ano nga klase sang brand sang vaccine, epektibo siya gihapon sa Delta variant. Nagaprotekta ina sa imo sa Covid-19– whether it is Beta, Alpha, or Delta. Safe gid or very protective gihapon [ang bakuna],” pahayag ni Padilla.
Ang Pfizer halimbawa ang nagapahayag nga 94% protective ini batok sa hospitalization. Ang AstraZeneca vaccine naman ang 92% nga protective batok sa hospitalization ukon severe nga kondisyon.
Kun mainfect ang isa ka unvaccinated individual ukon wala nabakunahan nga tawo, suno kay Padilla, posible nga mangin madugay ang pagtinir sa ospital, mangin severe ang kondisyon, kag mangin mas exposed ang baga sa virus.
“Ang bakuna, nagatarget ina siya sa korona sang coronavirus. Kun waay ka nabakunahan, mas exposed ang imo nga baga sa virus kay wala ka sang antibody nga gaprotekta sa imo. Ang Delta variant nagapangita pa gid siya sang iban nga paagi nga mabag-o niya ang shape sang iya nga spike agud makasulod sa imo nga baga. Kun mabakunahan ka, gina-block sang antibody ang virus kag indi makasulod sa imo nga baga [ang virus],” paathag pa sang natungdan.
Ang delta variant amo ang ikaapat nga variant of concern nga ginpahayag sang WHO nga mas transmissible ukon mas makalalaton ipaanggid sa nauna nga variant.
Sa India ini una nga natukiban, apang naapektuhan na sini subong ang masobra 80 ka mga pungsod sa kalibutan lakip na ang Pilipinas.
As of press time, ang Pilipinas ang may yara na sang 35 ka kaso sang delta variant sang COVID-19; 11 sa sini ang local cases lakip na ang duha nga taga-Antique nga wala man sang travel history sa iban nga mga pungsod. #
