ILOILO – Padayunon sang Bureau of Jail Management and Penology 6 ang kampanya may kaangtanan sa pag-angkon sang smoke-free community.
Ini matapos nga isa ang Bureau of Jail Management and Penology 6 sa mga ahensya sang gobyerno nga nakabaton sang Orchid Award halin sa Department of Health.
Sa Good Morning Philippines program, ginpahayag ni Jail Chief Inspector Maricon Tulayan, Assisstant Warden sang Iloilo City District Jail – Male Dormitory, nga ang Orchid Award ang ginahatag sa mga ahensya sang gobyerno nga nagapatuman sang anti-smoking campaign agud nga mangin smoke-free facility.
Suno kay Tulayan, tatlo na ka tuig humalin sang nangin smoke-free facility ang Iloilo City District Jail sa diin indi lamang ang mga preso ang sakop sang anti-smoking kundi lakip man ang tanan nga personnel sang Bureau of Jail Management and Penology.
Ginpahayag ni Tulayan nga daku nga pagpanghangkat para sa tanan nga jail warden ang pagpatuman sang nasambit nga mandu bangud nga indi man mahapos ang pagtapna sa nasambit nga bisyo.
Samtang, suno naman kay Jail Chief Inspector Abner Zamora, Warden sang Roxas City District Jail, indi lamang ang mga preso ang makabenepisyo sa pagpatuman sang anti-smoking kundi lakip man ang mga personnel kag ang mga nagabisita sa jail facility.
Suno kay Zamora, agud nga mapatuman sang maayo ang Anti-Smoking campaign, may yara sang ginahatag nga silot sa mga madakpan nga nagalapas sa pagsulundan.
Nagalaum naman si Zamora nga makabaton man sang Orchid award ang tanan nga district jail sa pungsod.
