Plano ni Iloilo 2nd District Board Member June Mondejar nga i-address ang issue sa serye sang holdup incidents sa lebel sang Sangguniang Panlalawigan.
Sa interview sang Bombo Radyo kay Board Member Mondejar, Chairman sang Committee on Public Order and Security, iya ginpahayag nga kinahanglan may yara anay siya sang detailed study may kaangtanan sa mga insidente nga natabo antes makahimo sang epektibo nga estratehiya.
Santu sa data sang Iloilo Police Provincial Office, sa sulod lang sang bulan sang Pebrero 2025, nakarekord na ini sang apat ka mga holdup incidents lakip na ang sa Pavia sang Pebrero 10 sa diin nakuha sang mga suspek ang P300,000 nga benta sang fuel tanker sang Metro Iloilo Transport Service Cooperative.
Pebrero 11, natabo naman ang ika-duha nga insidente sa Santa Barbara sa diin nabiktima ang isa ka manugbaligya sang herbal product kag nakuha sa iya ang ginabanta P20,000, bulong kag cellphone.
Pebrero 18 sang udto natabo naman ang holdup incident sa Barotac Viejo sa diin isa ka Indian national ang nabiktima kag nakuha sang mga suspek ang P4,500. Isa sa duha ka mga suspek ang nadakpan sang kapulisan.
Samtang pagkagab-i sang Pebrero 18, ginholdup ang isa ka manugbaligya isda sa diin nakuha sang mga suspek ang P159,000 nga cash kag cellphone.
Suno kay Mondejar, bangud sa madamo nga insidente sang holdup sa Iloilo, kinahanglan magdoble effort pa ang mga kapulisan kag mapabaskog ang ila mga tikang sa pag-identify kag pagdakop sang mga suspek kag agud indi na liwat nga matabo ang kaangay nga insidente.
Dugang pa sang natungdan, kun indi masolusyonan ang holdup incidents sa Iloilo mangin makaalarma ini sa publiko.
