ILOILO CITY- Posible nga magapasa sang sulat si Iloilo 4th District Board Member Rolando Distura nga amo man ang chairman sang Committee on Infrastructure sang Sangguniang Panlalawigan kay Department of Public Works and Highways Sec. Manuel Bonoan agud mangayo sang kopya sang resulta sang geotechnical investigation sa palpak nga Ungka Flyover.
Sa interview sang Bombo Radyo kay Board Member Distura, iya ginpahayag nga nagpromisa mismo ang Department of Public Works and Highways Region 6 sa provincial board kadungan sang natigayon nga committee hearing sang nagligad nga Hunyo nga hatagan nila sang full result ang Sangguniang Panlalawigan.
Ang Abinales Associates Engineers + Consultants amo ang gin-hire sang ahensya agud nga magpatigayon sang imbestigasyon.
Suno kay Distura, gin-contact niya mismo si Department of Public Works and Highways Region 6 Assistant Director Jose Al Fruto tuhoy sa resulta sang imbestigasyon apang nagsiling ini nga ginpasa na nila direkta sa central office.
Posible pahayag sang natungdan nga may direktiba nga gilayon ipasa sa central office ang nasambit nga resulta sang geotechnical investigation.
Apang siya bilang Chairman sang Committee on Infrastructure, kun indi gid man mahatag ang resulta dugang niya, ang status na lang kuntani sang Ungka Flyover.
Sa subong nga may bag o na nga direktor ang regional office sang ahensya, nagalaum si Board Member Distura nga maka-istorya man siya kay Director Engr. Sanny Boy Oropel kag ginakilala ini niya bilang maayo nga public official.
Nahibaluan nga ang kontrobersiyal nga P680 million nga flyover ang ginsirado sa mga motorista humalin sang Septyembre 18 sang nagligad nga tuig, 12 ka adlaw matapos nga nabuksan ini sa publiko.
