ILOILO CITY- Nag-file sang motion for reconsideration si Bohol Governor Erico Aristotle Aumentado nga naga-challenge sa iya anom ka bulan nga preventive suspension nga gin-file batok sa iya sang Ombudsman bangud sa ginaalegar kahilabtanan sa kontrobersyal nga resort sa Chocolate Hills protected area sa Bohol.
Suno sa gobernador, nakibot gid ini sa amo nga preventive suspension order kag hugot niya nga ginapanginwala ang ano man nga involvement sa pag-apruba sa construction, operation, kag expansion sang Captain’s Peak Resort.
Ini nga charges suno sa iya ang wala sang basehan kag kulang sang factual foundation.
Pahayag ni Aumentado, ang resort sa Sagbayan town ang gin-establish sang 2018 sang siya ang nagaserbe pa lang nga kongresista sang second district sang probinsya sa kongreso.
Dugang niya, wala man siya naimbitar sa Protected Area Management Board (PAMB) meeting sang July 2022, kun sa diin ang resolusyon nga naga- endorso sa development sang resort ang gin-aprubahan.
Si Aumentado ag 68 ka iban nga opisyal ang ginpaidalom sang Ombudsman sa preventive suspension sang anom ka bulan may kaangtanan sa imbestigasyon sa struktura sa Chocolate Hills, nga isa ka protected area kag geological park.
