Nagreklamo ang isa ka empleyado sang isa ka Business Process Outsourcing (BPO) company sa syudad sang Iloilo bangud sang indi husto nga patakaran sa ila opisina kasunod sang pagpositibo sa COVID-19 sang isa ka trabahador.
Sa interview sang Bombo Radyo kay Alias Rose, iya ginpahayag nga isa lang sila ka training room sang personnel nga sang damlag lang gin-anunsyo sang management nga positibo sa virus.
Suno kay Alias Rose, wala sang contact tracing nga ginpatigayon kag daw kaangay nga ginpabay-an lang sila bisan close contact sila sang amo nga pasyente.
Ang malain pa suno sa natungdan, business as usual sa gihapon ang ila nga arrangement ukon daw pareho lang nga wala sang natabo nga may infected sang balatian.
Ang rason sang management suno sa natungdan amo nga indi na sila kinahanglan nga mag-quarantine bangud nagsunod man sila sa minimum health protocol. N
agmato-mato na lang si Alias Rose nga magpaswab test kag nagahulat subong sang resulta. Pahayag ni Alias Rose, wala siya nagbalik sa trabaho bangud may anak pa siya nga ginaulikdan.
Suno naman kay Mr. Jeck Conlu, COVID-19 team spokesperson sang syudad, gin-imbestigaran na sang City Epidemiology and Surveillance Unit (CESU) ang amo nga reklamo.
Ginalantaw na sang CESU ang background sang kaso kag kun ano ang efforts sang management.
Kun mapamatud-an nga sala ang BPO company, may salabton ini suno kay Conlu nga paglapas sa COVID-19 protocol.
