Nagapabilin nga P70 kada adlaw lamang ang budget sang mga preso para sa ila nga pagkaon samtang P15 naman kada adlaw para sa ila kinahanglanon nga bulong.
Gintuad ini ni Justice Secretary Jesus Crispin ‘Boying’ Remulla kadungan sang budget briefing sa Kamara nga nagtutok sa Department of Justice (DOJ).
Sa amo nga hearing, ginpamangkot ni ACT Teachers Party-list Rep. France Castro kun ngaa ang subsistence kag medical allowance sa mga preso ang yara lamang gihapon sa P70 kag P15 base sa proposed 2024 budget sang ahensya.
Suno kay Remulla, nag-request ang Bureau of Corrections (BuCor) sa Department of Budget and Management (DBM) nga himuon nga P100 sa pagkaon kag P30 sa bulong apang ginbasura ang amo nga request.
Diri man ginbuyagyag nga nag-request man ang DOJ sang P23 billion agud magtukod sang bag-o nga mga presuhan agud maghalog-halog man ang mga preso sa jail facilities, apang wala man ini gin-aprubahan.
Yara na subong sa 383% ang congestion rate sang mga presuhan sa Pilipinas. #
