Nagdepensa si House Speaker Martin Romualdez sa ginpahayag nga pagdali sang Kamara nga maaprubahan ang hagna nga nagatuyo nga amyendaran ang 1987 Constitution.
Sabat ini sang house speaker sa komento ni Senate President Juan Miguel Zubiri kag sa kwestyon sini kun nga nagadali gid ang lower chamber.
Suno kay Romualdez, nakataya diri ang interes sang publiko — indi pulitika, kundi ekonomiya; indi eleksyon, kundi misyon nga ibangon ang mga tawo gikan sa kapigaduhon.
“Kung nagtatrabaho man kami ng mabilis, ito ay dahil interes ng mamamayan ang nakataya. Hindi pulitika, kundi ekonomiya ng bansa. Hindi eleksyon, kundi misyon na iahon ang mga kababayan natin sa kahirapan. Kailan pa naging kasalanan ang magtrabaho nang mabilis para sa bayan?,” pahayag sini.
Kun balikan, nagkwestyon si Zubiri bangud pagkatapos sang duha lang ka semana, aprubado na sa third and final reading ang Resolution of Both Houses 6 nga nagapatawag sang constitutional convention (con-con) agud i-amend ang 1987 Constitution kag ang House Bill 7352 ukon Con-con bill nga naga-provide sang composition para sa Con-con kag P10,000 remuneration per day sang attendance sang kada con-con delegate.
Paathag naman ni Romualdez, nagapangatubang ang pungsod sang tough competition kag kinahanglan ang pag-attract sang foreign investments agud ma-encourage ang dugang nga business activities nga makahatag sang high-paying kag quality jobs para sa mga Pinoy.
Ginpasalig man ni Romualdez nga apisar madasig ang hulag sang Kamara, wala sini ginkompromiso ang kalidad sang legislative work. ##
