Ginsabat sang China ang pahayag sang Estados Unidos sang Amerika nga untaton na sini ang delikado nga mga akto sa West Philippine Sea.
Suno kay China Foreign Ministry spokesperson Mao Ning, naga-intra kag naga-suporta ang Amerika sa pagsulod sang Pilipinas sa gina-agawan nga teritoryo bangud may yara man ini sang kaugalingon nga geopolitical interests.
Pahayag ni Mao, ginagamit lamang sang Amerika ang US Philippines Mutual Defense Treaty.
“For some time, out of selfish geopolitical interests, the US has incited, supported and assisted in the Philippines’ infringement and provocation at sea, and repeatedly made threats by citing the US Philippines Mutual Defense Treaty,” kabahin sang statement ni Mao.
Gindugang sini nga gina-reject sang China ang statement nga ginpaguwa sang Amerika bangud gina-endorso lamang sini ang pagpanghilabot sang Pilipinas sa soberanya sang China.
“The statement is an attempt to endorse the Philippines’ infringement of Chinese sovereignty and provocation. We firmly reject it.”
Ginsulit pa sa opisyal ang panindugan sang Beijing nga iligal, null and void, kag wala sang binding effect ang 2016 arbitral award sang international court nga nagdesisyon nga indi valid ang 9-dash nine claim sang China.
Dugang pa sini, mangin ang Estados Unidos ang wala man gani nagakilala sang judgement sang International Court of Justice kag international arbitral awards, gani wala ini sang kinamatarong nga manduan ang China nga ipatuman kun ano ang nakasaad sa amo nga arbitral award.#
