ILOILO CITY- Nagpaandam ang China sa Pilipinas batok sa flotilla sang civilian ships nga naglayag sa Bajo de Masinloc ukon Scarborough Shoal agud ipakigbato ang territorial sovereignty sa lugar.
Suno kay Wang Wenbin, tagpamaba sang Chinese Foreign Ministry, magahimo sang tikang ang China sa ila gintawag nga pag-abusar sa pagpasugot sang China sa Filipino fishing boats sa West Philippine Sea.
Gintumod ni Wenbin ang ginhimo sang China nga goodwill arrangement sang 2016 para sa Filipino fishermen nga mangisda gamit ang magagmay nga fishing boats.
Pahayag niya, kun padayunon sang Pilipinas ang ginahimo sini, depensahan sang China ang ila kinamatarung kag magahimo sang tikang bilang balos.
Matandaan nga kahapon, lima ka wooden-hulled commercial fishing ships kag halos 100 fishing boats ang naglayag padulong sa Bajo de Masinloc, isa ka feature sa West Philippine Sea, nga ginalauman nga matapos sa sulod sang tatlo ka adlaw.
Duha ka China Coast Guard (CCG) vessels naman ang nasiplatan nga nagalibot- libot sa convoy sang mga barko.
Nagapanindugan ang China nga kabahin sang teritoryo sini ang West Philippine Sea, kalakip ang Bajo de Masinloc.
