ILOILO CITY – Magapatigayon sang motu propio investigation ang Commission on Human Rights (CHR) Western Visayas kaangot sa duha ka separado nga insidente sang pagpangluthang-patay sa syudad sang Iloilo sang Domingo, Enero 19.
Sa interview sang Bombo Radyo kay Atty. Jonnie Dabuco, regional director sang CHR Region 6, iya ginpahayag nga hibaluon sang amo nga pamunuan kun bala na-constitute sa extrajudicial killing ang amo nga mga kaso.
Patay si Alian Muller alyas Kano, 42, sa Brgy. Cuartero, Jaro, kag suno sa kapulisan, ginasundan nga anggulo ang kaangtanan sini sa iligal nga droga.
Patay man si Delfin Britanico, 37 anyos, matapos nga ginluthang sa dalan sa Brgy. Nabitasan, La Paz, kag una nga ginsundan sang kapulisan ang anggulo sang road rage apang sang ulihi, ginapahayag nga posible nga naangot sa negosyo ang motibo sa pagpatay sa biktima.
Suno kay Atty. Dabuco, magapakig-angot gihapon ang CHR Region 6 sa Philippine National Police (PNP) apang separado ang pag-conduct sang imbestigasyon.
Umpisahan ang amo nga motu proprio investigation subong nga semana.
Nahibaluan nga sa bahin sang kapulisan, ginmandu naman ni Police Regional Office (PRO) 6 Regional Director PBGEN Rene Pamuspusan kay Iloilo City Police Office (ICPO) Director Police Col. Martin Defensor Jr. nga pa-imbestigaran ang nasambit nga mga kaso.
