Nagpakigsapol ang pinuno sang Central Intelligence Agency sang Amerika sa iya nga Russian counterpart agud magpaandam sa mahimo kunsekwensya pananglitan maggamit si Russian President Vladimir Putin sang nuclear weapons sa Ukraine.
Suno sa White House National Security Council, ginsapol ni Director William Burns si Sergei Naryshkin, head sang Foreign Intelligence Service sang Russia, may kaangtanan sa problema nga matuga sang tactical nuclear weapons kag sa risgo sini sa strategic stability.
Gin-athag sang Estados Unidos nga wala sila naga-negosyar ukon may ginahimo nga peace talks.
Sa amo nga pagsinapol, ginmuno man sang Estados Unidos sa Russia ang isyu sang US citizens nga ginpreso sa Russia.
Kun matandaan, ginpreso sa Russia ang US basketball star nga si Brittney Griner bangud sa drug charges amo man si Paul Whelan, isa ka auto supply company official nga nadakpan sang 2018 kag na-convict bangud sa pag-espiya.
May reports nga nagtanyag ang Washington sang prisoner swap.
Ginpahayag man nga handa ini nga ibaylo ang preso nga si Russian arms dealer Viktor Bout para mapapauli ang Americans.
