Trademark na sang pamilya Duterte ang indi pag-attend sa ila ginapangatubang nga mga kaso, ini suno kay Former Rep. Neri Colmenares, isa ka Human Rights Lawyer.
Kahapon,wala nagtambong si Vice President Sara Duterte sa hearing sang House Justice Committee nahanungod sa impeachment complaint batok sa iya; samtang wala man sa gihapon nagtambong si Anay President Rodrigo Duterte sa pagpagwa sang Ruling sang International Criminal Court sa apelar sini nahanungod sa hurisdiksyon sang ICC kahapon nga adlaw, Abril 22.
Sa interview sang Bombo Radyo kay Colmenares, isa ka Human Rights Lawyer, iya ginpahayag nga kaangay sang ruling sang appeals chambers nga wala nagpabor kay anay presidente Duterte, nagapati siya nga dako ang posibilidad nga indi man magpabor ang dalagan sang impeachment batok kay VP Sara kag mapahalin gid ini pwesto.
Suno man sa iya, imposible na man mabalik ni VP Sara ang kwarta nga ginamando sa iya sang Comission on Audit bangud sa ginpahayag nga paglapas sini sa spending rules.
Madumduman nga nagmando man ang COA sa OVP nga gilayon nga ibalik ang nasambit nga kwarta kag nagpahayag ipatuman ang disallowance sa ila opisina sa tion nga indi sila maghatag sang appeal sa sulod sang anum ka bulan.
Sa ginpatigayon nga impeachment hearing kahapon nga adlaw, ginkumpirmar sang Anti-Money Laundering Council (AMLC) nga may natumod ini nga covered kag “suspicious transactions” nga may kaangtanan kay VP Sara Duterte kag sa bana sini nga si Atty. Mans Carpio.
