ILOILO CITY- Yara na sa 90% ang pagpanghanda sang Commission on Elections- Iloilo para sa Barangay kag Sangguniang Kabataan Elections sa Oktubre 30, 2023.
Sa interview sang Bombo Radyo kay Atty. Reinier Layson, Provincial Election Supervisor IV, iya ginpahayag nga mayorya sa mga polling centers sa Iloilo ang natigayon na nga ma-inspect sang mga election officers.
Suno kay Layson, ginasiguro nga wala sang problema sa sulod sang polling centers kaangay sang koneksyon sang kuryente kag kadakuon sang hulot sa diin may yara sang requests nga nabaton ang Commission on Elections nga sayluhon ang iban nga polling centers bangud tuman ini ka gamay para sa numero sang mga botante.
Suno kay Atty. Layson, nakapreparar naman ang talatapan sang listahan sang mga electoral board ukon manunudlo nga magaserbe sa polling precincts.
Ang nahulat na lang gid sang Commission on Elections – Iloilo amo ang training para sa mga electoral board.
Sa subong nga 2023 base sa data sang Commission on Elections, may yara sang kabug-usan nga 1,669,320 voters sa Iloilo nga gianlakipan sang 332,903 voters sa syudad kag 1,336,417 sa probinsya.
