May mga naga-reklamo na batok sa pagsulundan sang gobyerno nga manukot sang 20 percent nga witholding tax gikan sa kompensasyon sang mga manunudlo nga magaserbe sa May 2022 elections, apang wala pa sang formal complaint ukon petisyon nga napalab-ot sa Commission on Elections (Comelec) Region VI.
Bisan si Comelec Region VI director Atty.Wilfred Jay Balisado ang aminado man nga daku ang 20 percent nga ibuhin sa honararium sang mga manunudlo apang segurista ang gobyerno suno sa iya kag natural lang ini para sa mga empleyado nga nagatrabaho sa gobyerno.
Ang 20 percent nga witholding tax sa compensation sang teachers subong nga tuig ang indi hamak nga mas mataas ipaanggid sa five percent nga ginkuha sang 2019.
Sa idalom sang Comelec Resolution No. 10727, nakasaad nga may P7,000 nga honorarium para sa chairperson sang election board (EB), P6,000 para sa members sang EB, P5,000 sa Department of Education supervisor official, kag P3,000 para sa support staff kag medical personnel.
Gin-athag ni Balisado nga tanan ini, covered sa mas mataas nga witholding tax. Mayo 2 maga-umpisa ang mga manunudlo sa pag-assume sang ila election duties. Mayo 9 patigayunon ang local kag national elections.
Una diri, may mga panawagan na nga ginpalab-ot sa Bureau of Internal Revenue (BIR) kag Comelec nga ipaiway anay ang pagsukot sang mataas nga withholding tax sa compensation sang teachers.
Ginapahayag sang mga naga-protesta sa sini nga lihok sang gobyerno nga mapintas ini kag tuman ka daku ilabi na bangud apektado man sang Covid-19 pandemic ang mga manunudlo.##
