ILOILO CITY- Ginkumpirmar sang COMELEC- Iloilo City nga nagpa-reactivate sang iya voter’s registration si former Iloilo City Mayor Jed Patrick Mabilog.
Sa interview sang Bombo Radyo kay Mr. Jonathan Sayno, Election Assistant II sang opisina, iya ginpahayag nga nabaton nila ang email ni Mabilog sang Agusto 22.
Ini naga-request sa pag-reactivate sang iya voter’s registration.
Suno kay Sayno, nag-schedule sang online interview ang COMELEC-Iloilo City sang Agusto 23 agud i-verify ang identity sang anay alkalde.
Ginpahayag sang natungdan nga sa Oktubre pa mahibaluan kun pagaaprubahan ang request sang anay opisyal sa mangin deliberasyon sang Election Registration Board.
Dugang ni Sayno, dako ang tsansa nga maaprubahan ini.
Matandaan nga ginkumpirma man sang opisina nga deactivated ang voting record sang former mayor matapos napaslawan ini nga makaboto sa lokal nga eleksyon sang 2019, presidential elections sang 2022 kag barangay elections sang 2023.
Gin-athag ni Sayno nga sa tion naman nga aprubahan ang reactivation ni Mabilog, mahimo ini nga magkandidato.
