PAVIA, ILOILO – Nagawangal ang Committee on Transportation sang Sangguniang Bayan sang Pavia, Iloilo bangud sang ginapahayag kakulang sang koordinasyon halin sa Department of Public Works and Highways may kaangtanan sa padayon nga ginatukod nga P480-million flyover sa Barangay Ungka II, Pavia, Iloilo.
Sa committee hearing nga ginpatigayon subong nga semana, natukiban nga duha tubtob tatlo ka tuig pa antes mahuman ang nasambit nga 453.70-meter flyover.
Sa interview sang Bombo Radyo kay SB Member Pyt Trimañez, chair sang Committee on Transportation, iya ginpahayag nga lakip sa ginplastar nga rason sang ahensya kun ngaa madugay pa makumpleto ang proyekto amo ang nagapadayon pa nga negosasyon sa pila ka mga properties nga wala pa na-acquire.
Magluwas diri, ginrason man sang DPWH Region VI ang ‘by phase’ nga pagpagwa sang budget halin sa national government.
Suno kay Trimañez, kuntani maplastar kag mareview sang DPWH ang alternative routes bangud santo sa pagpangusisa sang Pavia Traffic Management Office, may pila ka dalan sa amo nga mga ruta nga maagyan man apang tuman ka budlay para sa drivers bangud gubaon ang alagyan.
Nagapangabay ang Committee on Transportation nga hatagan man sila sang impormasyon may kaangtanan sa dugang nga mga update sa construction sang flyover agud mabuhin-buhinan man ang huol sa pagpugok sang trapiko kag paglain-lain sang traffic scheme sa amo nga banwa.
