Napilasan sa ulo ang isa ka construction worker matapos ginlabo sang kaupod sini nga construction worker bangud sang ginaalegar nga kasabad sang biktima matapos ang ila nga pag-inum-inom.
Natabo ang insidente sa sulod sang ila boardinghouse sa Barangay Loboc, Lapuz, Iloilo City.
Ang nasamaran amo si alias Ray, 47-anyos, residente sang San Lorenzo; Guimaras, samtang ang suspek naman amo si alias Cyrus, 41-anyos, residente sang Camarines Sur.
Sa interview sang Bombo Radyo kay Pol. Lt. Joursy Orrica, officer-in-charge sang Iloilo City Police Station 8, iya ginpahayag nga magkaupod pa nga nag-inum-inom ang duha antes ang insidente.
Ginapahayag nga nag-untat na ang suspek kag nagsulod na sa kwarto agud nga magpahuway, apang nagapadayon sa pagpangulit ang biktima.
Suno kay Orrica, posible nga sang nasabadan na ang suspek, nagguwa ini, kag sang ulihi, natabo ang komosyon.
Nagkuha ang suspek sang binangon nga ginabanta 22 pulgada ang kalabaon.
Ginlabo sini sa ulo ang biktima apang wala man sini ginkuhaan sang tagob ang binangon. Bangud sa impact, na-utod ang punta sang tagob.
Nagguwa sa imbestigasyon nga wala man sang daan nga hiligut-anon sa tunga sang duha kag posible suno sa pulis nga wala man sang intensyon ang suspek nga patyon ang biktima.
Gindala ang biktima sa ospital samtang gin-detain naman sa Police Station 8 ang suspek matapos nga naaresto sa ila man mismo nga boardinghouse.#
