Nagpasalig ang Department of Agriculture (DA) kag ang Bureau of Fisheries and Aquatic Resources (BFAR) sang bulig nga ihatag sa mga mangunguma kag manugpangisda nga apektado sang paglupok sang Bulkan Kanlaon.
Suno kay Agriculture Assistant Secretary Arnel de Mesa, padayon ang monitoring sang ahensya sa sitwasyon kag ginatipon pa lamang ang reports sang agricultural damage sa Negros kasunod sang natabo sang Lunes sang gab-i.
Lakip sa apektado suno sa iya amo ang Canlaon sa Negros Oriental kag areas sa Negros Occidental lakip ang La Castellana, La Carlota, Pontevedra, Bago, San Enrique, Hinigaran kag Binalbagan.
Para naman sa sector sang pagpangisda, ginsiling ni BFAR Spokesperson Nazario Briguera nga preparado ang tanan nga provincial fishery offices nga mag-hatag sang assistance sa apektado nga mga manugpangisda ilabi na sa freshwater inland fish ponds.
Ginpasalig sini nga may preposition sang fingerlings nga mahimo ipanagtag kun mapierde gid ang ila harvest bangud sa epekto sang abo kag asupre halin sa mga aktibidad sang bulkan.
Sa sugar industry naman, naka-report na ang Sugar Regulatory Administration (SRA) sang pagsaka sa acidity levels sa mga dahoon sang tubo kag sa duta.
Halin sa 6.48 pH ground testing result sang nagligad nga semana, ang pH level sa daon sang tubo ang yara na sa 4.14 pH kag 5.06 pH sa ground soil kasunod sang ashfall. Ginpahayag man sang ahensya nga sa possible yara sa 23,000 hectares sa apat ka sugar mill districts ang apektado sang volcanic eruption.
Photos courtesy of Mt. Kanlaon Natural Park
