ILOILO CITY – Nakit-an nga naga-amat amat na gid man hinay ang dalagan sang mga salakyan sa Traffic Discipline Zone sa Sen. Benigno Aquino Jr. Avenue ukon Diversion Road sa Mandurriao, Iloilo City.
Sa interview sang Bombo Radyo kay Land Transportation Office 6 (LTO-6) Director Atty. Gaudioso Geduspan, iya ginpahayag nga santo sa iya assessment, nagasunod na ang mga drivers sa pagsulundan sa trapiko bangud man sa hugot nga pag-implementar sini sang mga law-enforcement bodies kaangay sang LTO , Highway Patrol Group (HPG), kag Transportation Management and Traffic Regulation Office (TMTRO).
Suno kay Geduspan, halin sang Pebrero 12, yara sa 30 ka motorista ang ila nadakpan nga naga-overspeeding.
Ang mga penalidad sa madakpan nga naga-overspeed sa Traffic Discipline Zone amo ang mga masunod: P2,000 sa First-time Offender; P3,000 sa Second-time Offender; P5,000 sa Third-time offender; kag, kun magsobra pa diri, posible naman nga ma-kumpiska ang driver’s license.
Ginpahanumdom man ni Geduspan nga yara lang dapat sa 60 kms/hour ang speed sang light vehicles, samtang yara naman sa 50 kms/per hour ang dalagan sang dalagku nga salakyan.
Exempted naman ang mga emergency vehicles sa amo nga pagsulundan.
Nagpaandam man si Geduspan sa mga salawayon nga drivers nga wala naga-untat ang otoridad sa pagbantay sa trapiko ilabi na sa Traffic Discipline Zone.
