Nagapanindugan si Iloilo Governor Arthur Defensor, Jr. nga indi na kinahanglan pa nga i-postpone ang pagbukas sang klase para sa school year 2022-2023 pananglitan nga magsaka gid man ang Covid-19 cases.
Ginplastar sang gobernador nga dapat balikan kun ano ang nakabutang sa Alert Level System kag ang status sang Covid-19 vaccination sa probinsya.
Yara subong ang Iloilo Province sa Alert Level One kun sa diin ginapahanugutan ang mga establisyemento nga makabukas, kag ginapahanugutan man ang mga tawo nga maka-trabaho sa full on-site ukon venue/seating capacity sa kondisyon nga ginapatuman ang minimum public health standards.
Sa vaccination rate, 86.98% sa Iloilo Province ang fully vaccinated, samtang may pagpanghangkat naman sa kampanya sa booster shot bangud 16.7% pa lamang ang naka-avail sang booster dose.
Sa interview sang Bombo Radyo kay Defensor, iya ginpahayag nga nagahulat ang pagbangon sang ekonomiya sa pagbukas sang mga klase bangud diri suno sa iya naga-umpisa ang sirkulasyon sang mga tawo.
Kun amo sini ang vaccination rate kag alert level sa Iloilo, kumpyansa ang probinsya suno kay Defensor nga ipadayon ang pagbukas sang klase.
Sa latest report sang OCTA Research Group, nakit-an man nga nagapanubo na ukon yara na sa downward trend ang Covid-19 cases sa Iloilo Province.
Suno kay OCTA fellow Guido David, ang growth rate (ukon ang weekly change sa average new cases) ang yara sa -18 percent sa Iloilo City kag -11 sa Iloilo province.
Ang negative growth rate ang naga-indicate nga nagapanubo na ang average new cases.
