ILOILO CITY – Ginbawi sang isa sa mga ginatudlo suspek sa pagpatay kay Negros Oriental Governor Roel Degamo ang iya pahayag kag ginpanginwala nga may nahibaluan ini sa assasination kag sa gina-alegar mga masterminds nga sanday suspended Negros Oriental Representative Arnolfo “Arnie” Teves Jr. kag ang former bodyguard sini nga si Marvin Miranda.
Suno kay Atty. Harold Montalbo, abogado sang ginatudlo suspek nga si Mr. Osmundo Rivero, ginbawi ni Rivero ang tanan nga ginpahayag niya nga isa siya sa mga suspect sa pagpatay kag isa sa mga nagplano sang krimen.
Sa lima ka pahina nga counter-affidavit, ginpahayag ni Rivero nga ginpilit siya nga itudlo si Teves nga isa sa mga nagmandu sa pagpatay sang siya ang yara sa headquarters sang Philippine National Police.
Dugang pa niya, ginhambalan siya sang abogado sa Public Attorney’s Office nga ginhatag sa iya nga magsunod na lamang sa mga demands sang pulis agud nga indi masakit.
