ILOILO CITY – Ginpagwa na sang Department of Education (DepEd) ang mga pagsulundan sa enrollment para sa 2022-2023 School Year nga magasugod sa Agosto 22.
Ang DepEd Order No. 35 ang naga-provide sang pagsulundan para sa mga school heads, manunudlo kag sa mga ginikanan may kaangtanan sa bag-o nga enrollment process nga magasugod naman sa Hulyo 25 kag magatakop sa Agosto 22 sa una nga adlaw sang school year.
Sa nasambit nga pagsulundan, ang enrollment ang iga-administer pinaagi sa in-person, remote, kag enrollment pinaagi sa dropbox forms.
Para sa in-person mode, suno sa DepEd, ang mga ginikanan kag estudyante ang mahimo nga process physically sang ila nga enrollment samtang naga-obserbar sang minimum health kag safety standards.
Sa remote enrollments, ini ang mahimo nga i-facilitate pinaagi sa pag-fill out sang digital forms kag pag-send pinaagi sa official email address sang eskwelahan ukon sa kun ano nga available messaging platforms nga ihatag sang eskwelahan.
Samtang, mahimo man nga mag-fill out sang forms sa ila panimalay ang mga ginikanan kag mga estudyante kag ipasa sa drop boxes sa mga eskwelahan.
Matandaan nga ginpahayag ni Vice President kag Education Secretary Sara Duterte nga ang combined in-person classes kag distance learning ang ipatuman humalin sang Agosto tubtob Oktubre samtang ang lima ka adlaw nga face-to-face classes ang ipatuman sa Nobyembre.
Ang mga eskwelahan suno kay Duterte ang mahimo na nga magbukas bangud nga ang health protocols ang yara na nga daan sa sulod na sang duha ka tuig.
