Nanindugan si PDP-Laban spokesperson kag Deputy Speaker Johnny Pimentel nga wala sang ginaplano nga mga tikang sa pagsipa kay House Speaker Alan Peter Cayetano sa iya nga posisyon sa Kamara.
Gintawag pa ni Pimental nga ‘baseless’ kag ‘unfounded’ ang gina alegar coup d’etat batok kay Cayetano.
Madumduman una na nga ginakusaran ni Cayetano si Marinduque Rep Lord Allan Velasco nga siya ang yara sa likod sang nasambit nga ouster plot.
Suno kay Cayetano, ginatanyagan ni Velasco ang 20 ka mga kongresista sang puwesto sa Kamara kag budgetary allocation para sa ila tagsa ka mga distrito.
Dugang sang natungdan, mismo ang 20 ka mga kongresista nga gintanyagan ni Velasco ang nanugid sa iya may kaangtanan sa gina alegar ouster plot nga ginaplano batok sa iya.
Nahibaluan nga base sa ila term-sharing agreement, si Velasco sang PDP-Laban ang magatal-os kay Cayetano sa speakership post sa Oktubre.
Suno naman kay Pimentel wala sang kamaturuan ang mga gina alegar kay Velasco ini bangud pito nalang ka bulan kag magapanaog na si Cayetano sa iya speakership post base sa kasugtanan kag magatal-os na siya sa posisyon.
