ILOILO CITY-Nagpahanumdom liwat ang Department of Labor and Employment (DOLE) Region 6 nga indi paggamiton nga kahigayunan ang programa nga Tulong Panghanap-buhay sa Ating Disadvantaged/Displaced Workers (TUPAD) agud mag-endorso sang mga political candidates.
Sa interview sang Bombo Radyo kay Melisa Navara, Officer-in-Charge Assistant Regional Director sang Department of Labor and Employment Region 6, iya ginpahayag nga may yara man sila sang protocol nga dapat sundon sang ila mga coordinator kag staff.
Suno kay Navara, ginahingyo man nila sa mga pulitiko nga magpatigayon nalang sang separado nga aktibidad agud indi magamit ang TUPAD sa pamulitika.
Gin-athag man niya nga indi gid man malikawan ang presensya sang mga politiko bangud nga partner nila ang local government sa nasambit nga programa ilabi na sa pagpili sang nagakadapat nga benepisyaryo.
