ILOILO CITY – Nagpautwas sang kalain sang buot ang isa sang mga driver sang modernized jeepney nga nagtanyag anay sang free ride ukon ‘Libre Sakay’ sa syudad sang Iloilo apang wala nahatagan sang hustisya sa sweldo.
Ang Libre Sakay ang napaidalom sa Service Contracting Program (SCP) nga ginpatuman sang Land Transportation Franchising and Regulatory Board (LTFRB) kag sang Department of Transportation (DOTr).
Abril 19 sang nag-umpisa byahe ang mga jeep nga nagatanyag sang Libre Sakay kag natapos ang programa sang Hunyo 30.
Sa Memorandum Circular No. 2021-029, ang mga driver sang jeep nga nagabyahe sa syudad ang makabaton sang national government subsidy nga P52.50 kada kilometro.
Agud matumod ang kalawigon sang byahe, may mga cellphone nga may Global Positioning System (GPS) nga ginbutang sa mga nagabyahe nga jeep.
Sa interview sang Bombo Radyo kay Alias June, iya ginpahayag nga ang iya nabaton nga sweldo ang para lang sa una nga semana sang iya nga pagbyahe sang Abril.
May impormasyon nga nabaton si Alias June nga na-release na sang LTFRB ang sweldo para sa ikaduha nga semana apang ginbayad sa utang sang kooperatiba sa bangko.
Ang rason pa gid nga ginhatag sa ila suno kay Alias June amo nga ginbayad ang partial payment sang LTFRB sa maintenance sang mga jeepney units.
Pahayag ni Alias June, sang nagligad lang, ginpa-cash advance sila sang P5,000.
“Ginpa-cash advance kami sang P5,000 pero sweldo na ‘to gali kay kaduha na mag-pay-out ang LTFRB. Ang problema kay wala sila sa amon ga-prangka. Ang hambal nila sa amon nga nanghulam lang kuno sila sang tag-5,000 kag ipa-cash advance sa amon, pero nag-pay-out na gali ang LTFRB? Sang makaduha ka beses? Te ano na nga pag-blind sa amon nga mga driver?,” pahayag ni Alias June.
Suno kay Alias June, kuntani unahon man sila bayad bangud gutom na sila halin sang nag-umpisa sang byahe kag wala na sang sarang nga ipakaon sa pamilya.
SUNO SA KOOPERATIBA
Nagsabat naman si Mr. Rizalito Alido, Board Secretary sang Iloilo City Alliance of Operators and Drivers Transport Cooperative (ICAODTC) kaangot sini
“I do not know kun sin-o sina nga driver ang nagareklamo. Kadto ka sa opisina kag kadto sa akon,” pahayag ni Alido.
Sa interview sang Bombo Radyo kay Alido, iya ginpahayag nga makapila na ka beses ini nga ginpaathag sa mga driver apang indi niya mahangpan ang ‘thinking’ sang drivers kun ngaa sulit-sulit man ang reklamo.
Suno sa natungdan, bangud partial lang ang hatag sang DOTr kag LTFRB, partial man ang ihatag sa driver sang jeep.
Suno pa kay Alido, indi man lang driver ang gina-atender sang kooperatiba bangud may operation pa kag maintenance nga kinahanglan tutukan.
