Gin-anunsyo sang Department of Social Welfare and Development (DSWD) nga mahimo maka-avail sang ayuda ang mga driver sang jeep nga maapektuhan sang Public Utility Vehicle Modernization Program (PUVMP).
Suno kay DSWD Program Management Bureau Director Miramel Laxa, ang kutob sang maapektuhan sang modernization scheme ang mahimo mapaidalom sa kategorya nga “in crisis” kag pwede gid nga mahatagan sang cash aid sa idalom sang Assistance to Individuals in Crisis Situation (AICS) program.
Apang suno sa ahensya, one-time assistance lamang ini.
“Availing of AICS can help them meet their basic needs through different forms of assistance such as food, and cash aid, among others,” suno kay Laxa.
Dugang ni Laxa, mahimo man makonsiderar ang drivers sa livelihood programs kag grants nga ginatanyag sang iban nga ahensya sang gobyerno.
Nahibaluan nga Disyembre 31 ang deadline nga gin-set para sa PUV operators nga mag-consolidate ukon magpaidalom sa kooperatiba ukon korporasyon. Isa ang franchise consolidation sa importante nga component sang modernization plan sang gobyerno.
