Ginapa-komento sang International Criminal Court (ICC) ang gobyerno sang Pilipinas kaangot sa ginaduso nga pagbukas liwat sang imbestigasyon batok sa kontrobersyal nga drug war sang administrasyon ni anay Presidente Rodrigo Duterte.
Sa order nga napetsahan sang Hulyo 14, naghatag ang ICC sang petsa nga tubtub sa Septyembre 8, 2022 agud nga maka-provide ang Pilipinas sang obserbasyon sa ginaplano nga pag-imbestigar liwat sa drug war.
Naghatag man sang instruksyon ang ICC sa prosecutor— ginatiglawas nanday Karim A. A. Khan kag Colin Black— nga mag-sumite sang response sa mangin obserbasyon sang Philippine government.
Naghingyo man ang Pre-Trial Chamber I sang ICC sa drug war victims kag sa ila nga mga pamilya nga magkomentar sa amo nga isyu.
Ang Victims Participation and Reparations Section (VPRS) amo ang ginmanduan nga makig-angot sa mga biktima kag sa ila nga mga abogado. Ang tanan nga matipon nga reklamo ang iga-pasa man sa ICC sa Septyembre 22.
Matandaan nga nag-request si ICC Chief Prosecutor Khan nga i-resume ang imbestigasyon sa war on drugs banguid ginapahayag nga wala man ginpakita sang Pilipinas nga naga-imbestigar ini ukon nagabusisi sa mga nationals nga amo ang ginalantaw may mga kaangtanan sa mga pagpamatay nga amo naman ang gina-angot sa drug war.
Kun basehan ang rekord sang gobyerno, yara sa masobra 6,000 ang napatay nga drug suspects sa police operations halin sang nagpungko si Duterte.
Mas manubo ini nga rekord sa ginauyatan sang pila ka human rights groups nga nagpahayag nga 12,000 tubtub 30,000 ang nagkalamatay.
