ILOILO – Ginabanta nagalab-ot sa P60, 000 ang balor sang 13 ka suspected shabu nga natigayon nga makuha sa isa ka lalaki nga nadakpan sa buybust operation sa Brgy. Camambugan, Balasan, Iloilo.
Ang suject sang buy bust operation amo si Kasmar Bacaro, 28 anyos, tumandok sang Ivisan, Capiz.
Sa interview sang Bombo Radyo kay PMAJ Jonathan Pinuela, pinuno sang Iloilo Provincial Drug Enforcement Unit, iya ginpahayag nga una na nga nadakpan si Bacaro sang Agosto 2016 sa pagbaligya man sang iligal nga droga.
Bangud sa plea bargaining suno kay Pinuela, nakagwa si Bacaro sang May 2019.
Dugang ni Pinuela, santu man sa pahayag sang suspetsado, mismo sa Roxas City sini ginakuha ang iligal nga droga kag ginabaligya sa quinto distrito, lakip na ang Balasan, Batad, Carles, kag Estancia.
SAN RAFAEL, ILOILO.
Dakup man sa isa pa gid ka buy bust operation nga ginpatigayon sang Iloilo Provincial Drug Enforcement Unit ang isa ka lalaki sa Sitio Balabag, Brgy. Poblacion, San Rafael, Iloilo
Ginkilala ang subject kay Ramy Delojo, 39 anyos kag naga-obra bilang manug-ihaw sang baboy kag manugtanom sang humay sa amo nga lugar.
Suno kay Pinuela, ila nga nakuha sa possession ni Delojo ang isa ka daku nga sachet kag apat ka magagmay nga sachet sang suspected shabu, kag ginabanta nga nagabalor ang mga ini sang P15000.
May nakuha man nga one unit sang 45 cal pistol sa subject.
Ginpahayag man sang natungdan nga nagagamit man sang iligal nga droga ang subject.
Dugang pa ni Pinuela, santu sa pahayag sang subject, sa Bacolod City nagahalin ang drug items.
