ILOILO CITY- Hatagan sa gihapon sang tsansa nga makapaathag ang duha ka police officers sa Police Regional Office 6 nga nagpositibo sa confirmatory drug test.
Isa sa ila ang assigned sa Negros Occidental Provincial Police Office kag ang isa ang assigned mismo sa Regional Headquarters.
Sa interview sang Bombo Radyo kay PMaj MaryGrace Borio, spokesperson sang Police Regional Office 6, iya ginpahayag nga matapos nabaton sang amo nga mga pulis ang notice angot sa complaint batok sa ila, hatagan ang mga ini sang kahigayunan nga ma-counter ang gin-file nga administrative case batok sa ila.
Suno kay Borio, may yara sang summary hearing officer nga amo ang magaproses sang ila sabat sa complaint.
Sa pihak sini, ginpahayag ni Borio nga dako sa gihapon ang tsansa nga dismissal sa serbisyo ang mangin pamatbat batok sa duha ka pulis.
