Ipatuman sa bug-os nga probinsya sang Iloilo ang duha ka semana nga istrikto nga quarantine kun sa diin indi pagpahanugutan ang non-essential ukon indi importante nga mga byahe sa mga banwa kag sa syudad sang Passi.
Epektibo sa Byernes, Hunyo 4, ang amo nga pagsulundan kag magalawig tubtob sa Hunyo 18.
Sa Executive Order No.175 nga ginpagwa ni Iloilo Governor Arthur Defensor, Jr., nakasaad nga kinahanglan man ang travel pass para sa mga tawo nga ginapahanugutan nga makaagi sa control points.
Ang pahanugutan lang nga makagwa-sulod amo ang:
- Health and emergency frontline services personnel;
- Government officials and government frontline personnel
- Mga tawo nga nagabyahe para sa humanitarian reasons
- Mga tawo nga nagapadulong sa kag nagapauli halin sa airport
- Mga tawo nga nagatabok sa mga banwa para sa trabaho, negosyo nga ginapahanugutan sang LGU, aktibidad nga otorisado sang IATF
- Mga drivers kag operators sang pampubliko nga salakyan
Ang mga APOR halin sa national government kag iban nga government offices ang dapat magpresentar sang Government Travel Pass ukon Travel Order/Itinerary.
Ang mga APOR halin sa pribado nga sektor ang dapat magpresentar sang Company/Travel Pass.
Ang iban nga APOR nga may trabaho kag negosyo sa iban nga livelihood sectors ang dapat magsecure sang LGU Travel Pass halin sa alkalde sang banwa ukon syudad.
Ang pag-isyu sang LGU travel pass ang mahimo nga i-delegate sang alkalde sa mga punong barangay.
Dapat nga masecure na sang mga APOR ang ila nga Travel Order ukon Travel Pass antes ang Hunyo 4.
Suno kay Iloilo Governor Arthur Defensor Jr., ipatuman ang barangay monitoring kag control points agud ma-check ang travel pass sa nagasulod-gwa sa mga banwa kag sa component city.
