Nagpangabay si Senate Deputy Majority Leader JV Ejercito kay Senator Ronald “Bato” Dela Rosa nga magboluntaryo na lang nga mag-untat anay sa pagbaton sang iya sweldo kag mga allowance halin sa Senado.
Kasunod ini sang nagapadayon nga pag-absent ni Dela Rosa sa mga sesyon kag tanan nga aktibidad sang Senado halin sang Nobyembre 2025.
Nag-umpisa nga nangindulaan si Dela Rosa matapos gin-alegar ni Ombudsman Jesus Crispin “Boying” Remulla nga nag-gwa na ang arrest warrant sang International Criminal Court (ICC) batok sa iya bangud sang iya nangin papel bilang Philippine National Police (PNP) chief sang tion nga ginpatuman ang Duterte drug war.
Bangud sa iya pagpalagyo, siya ang Rank 1 sa may pinakadamo nga absent sa Senado halin sang Hulyo 28, 2025 tubtub sang Marso 18, 2026.
Sa statement naman nga gin-post ni Ejercito nga amo ang chairman sang Senate committee on ethics and privileges, ginsiling sini nga kun nagasunod ang ordinaryo nga mga Pilipino sa “no work, no pay” nga patakaran, mas labi nga amo man sini ang dapat nga himuon sang mga public servant.
“Gaya ng mga ordinaryong Pilipinong ‘no work no pay,’ lalo’t higit ganoon din dapat ang mga lingkod-bayan. Public service is a public trust, we are all accountable to the people we serve,” suno kay Ejercito.
Una na nga ginpahayag ni Ejercito nga kinahanglan anay nga amyendaran ang pagsulundan sang Senado agud nga makadagdag sang sanctions batok sa mga senador nga naga-absent sang malawig.
Wala sang existing “no work, no pay” policy sa upper chamber.
“As stated before, even by Senate President Sotto, the Senate has yet to establish rules that can compel attendance. Any formal action will take time, as it must go through amendments and proper deliberation,” dugang sang senador.
Ginpahayag man anay ni Ejercito nga kun may patigayunon nga hearing kaangot sa ethics complaint batok kay Dela Rosa samtang nga wala pa ma-amyendaran ang Senate rules, posible nga mabasura man gihapon ang amo nga reklamo.#
