Gin-anunsyo sang Presidential Communications Office nga ipaguwa sang Water Resources Management Office subong nga semana ang gina-rekomendar nga mga tikang agud ma-address ang mangin epekto sang El Niño phenomenon.
Ini ang kasunod sang direktiba ni President Ferdinand Marcos Jr. sa nasambit nga water body nga pahagan-haganon ang epekto sang El Niño subong nga tuig.
Suno kay Marcos, nagabulig ang Department of Environment and Natural Resources, Department of Agriculture, Department of Public Works and Highways kag ang National Irrigation Administration sa amo nga water body agud nga maplanuhan ang mga himuon.
Gin-anunsyo man ni Marcos nga gin-tap sini si anay Public Works and Highways secretary Rogelio Singson agud makabulig sa gobyerno nga makabalay sang solusyon.
Kilala si Singson nga isa ka water management expert kag amo ang ginalantaw nga makabulig sa contingency measure para sa El Niño kag amo man ang magahimo sang overall plan para sa Pilipinas.
Ginpahayag man ni Marcos nga indi pa El Niño ang mabatyagan subong nga mainit nga tyempo; apang ginpasalig sini nga subong pa lang, nabalay na sang gobyerno ang overall plan agud mangin handa naman ang Pilipinas pananglitan maglala gid ang El Niño.
