ILOILO CITY-Nagapatigayon na sang imbestigasyon ang Naga City Police Office (NCPO) kaangot sa naggwa nga video nga isa ka estudyante ang ginakastigo sang pareho man nga mga estudyante.
Nalakip sa ginahibalo kun initiation sang fraternity ang natabo.
Base sa video, may tabon sa mata kag ginasumbag sang pila ka estudyante kun sa diin nagluluhod gid ang biktima.
Suno kay Police Major Alex Sumayao, Station Commander sang NCPO Station 3, nagapakig-angot na ang ila nga Women and Children Protection Desk sa natungdan nga ahensiya bangud nga mga menor de edad ang yara sa video.
Natumod naman kun sa ano nga eskuwelahan nagabutho ang mga estudyante nga yara sa Junior High School.
Ginkondena naman sang pamunuan sang eskwelahan kag Department of Education ang natabo.
Mahimo nga mapahalin sa eskwelahan ang mga estudyante nga involved sa insidente, depende sa ila nga partisipasyon.
