ILOILO CITY – Naghatag sang bugal sa Pilipinas ang isa ka Ilonggo matapos napilian sa nga makasulod sa Research Science Institute nga ginpatigayon sa Massachusetts Institute of Technology sa Cambridge, Massachusetts.
Ini amo si Hans Mathew Mestidio, 17, residente sang Barangay Cagamutan Sur, Leganes, Iloilo.
Si Mestidio ang incoming grade 12 student sang Philippine Science High School Western Visayas Campus.
Sa interview sang Bombo Radyo kay Mestidio, iya ginpahayag nga sa ila batch, ginapabugal sini ang pagdala sang pangalan sang Pilipinas sa Research Science Institute.
Suno kay Mestidio, tuman ang iya kalipay bangud nahatagan ini sang kahigayunan nga mangin kabahin sang ginakabig nga ‘most prestigious science research camp’ sa bilog nga kalibutan.
Sa subong, nagahimo ini sang independent research sa surface energies sang crystal lattices.
Magalawig naman ang iya research sa Mesoscale Nuclear Materials Group tubtob sa Agusto.
