Magabutang ang isa ka foreign chamber sang opisina sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga nag-courtesy visit sa iya si European Chamber of Commerce of the Philippines (ECCP) Executive Director Florian Gottein kag nagpabutyag sang interes nga magpatukod sang opisina sa syudad.
Suno sa alkalde, nakit-an sang ECCP nga mainuswagon ang syudad sang Iloilo kag isa gid ka potensyal nga lugar para sa negosyo.
Ginpahayag man sang alkalde nga antes sini, may plano man kuntani ang American Chamber of Commerce nga magpahamtang man sang opisina sa syudad apang wala nadayon bangud nag-abot ang Covid-19 pandemic.
Suno kay Treñas, nagaupod lang anay ang ECCP sa opisina sang Iloilo Business Club apang nagapangita naman sang lugar agud nga makasugod naman sa pag-operate.
Kun may foreign chamber na sa syudad, ginalauman nga magadamo pa gid ang investments.
Madumduman nga sang 2020, apisar sang pandemya, ginkilala ang syudad sang Iloilo bilang most business-friendly local government unit sa pungsod sa guwa sang Metro Manila.
Sang 2019, ginkilala man ini bilang most business friendly city sa pungsod kag winner sang 2019 Most Business-Friendly Highly Urbanized City.
