Nagnubo na sa Alert Level 1 ang klasipikasyon sang syudad sang Iloilo kag kadungan sini, may mga pagbag-o man nga gin-anunsyo ang gobyerno may kaangtanan sa face-to-face classes sang mga estudyante sa kolehiyo.
Sandig sa latest guidelines nga gin-aprubahan sang National Inter-Agency Task Force, nakasaad nga ginapahanugutan na ang mga kolehiyo kag unibersidad sa mga lugar nga naka-Alert Level 1 nga pun-on ang mga classrooms ukon pwede na ang 100% nga seating capacity.
Apang sa interview sang Bombo Radyo kay Commission on Higher Education (CHED) Region VI Director Raul Alvarez, iya ginpahayag nga 80% seating capacity pa lang subong ang ginasunod sa rehiyon.
Buot silingon, may 1.5 metros sa gihapon nga espasyo sa tunga sang mga estudyante agud nga masunod ang physical distancing.
Magluwas diri, kinahanglan gihapon nga bakunado ang mga manunudlo, non-teaching personnel, kag mga estudyante agud nga mapahanugutan nga makabalik sa in-person classes.
Sa Western Visayas, may gamay pa nga dapat pauswagon sa vaccination rate sa mga estudyante.
Suno sa director, yara pa lang sa 73.8 percent sa mga estudyante sa mga kolehiyo sa Rehiyon VI ang nabakunahan; buot silingon, isa sa kada apat ka estudyante ang indi bakunado.
Sa pagsulundan sang gobyerno, kun indi bakunado ukon kun indi pa fully-vaccinated ang estudyante, may opsyon ini nga padayunon ang pag-eskwela apang sa idalom lang sang flexible learning modalities.
DUGANG NGA MGA ESKWELAHAN
Sa bug-os nga Western Visayas, may yara na sang 37 ka mga kolehiyo kag unibersidad nga ginatugutan nga maka-patigayon sang limited face-to-face classes.
Suno kay Alvarez, sa masunod nga semana, ginalauman nga mapaguwa ang permit para sa anum pa ka dugang nga eskwelahan agud makasugod naman sa in-person classes.
Target sang CHED Region VI nga mapahanugutan na ang at least 75 ka mga colleges and universities sa Western Visayas nga maka-resume sa face to face classes sa katapusan nga bahin sang Marso subong nga tuig.
Sa pagbalik sang face-to-face classes, dapat man nga padayunon sang colleges and universities ang pagkuha sang technical assistance halin sa ila tagsa ka Local Government Units, local Inter-Agency Task Force, CHED Regional Offices, kag Commission on Higher Education Experts Group. ##
