Nagbunga gid ang paghimakas sang isa ka female cadet bangud halin sa pagtrabaho sini sa photocopy center kag paglibod sang siopao sa eskwelahan, sa subong, topnotcher na ini sa graduating class sang Philippine National Police Academy (PNPA)!
Ini amo si Police Cadet Ma. Camille Cabasis nga nagpanguna sa 233 graduates sang PNPA Layag-Diwa Class of 2024.
Naggradwar ini nga cum laude sa Batangas State University kag ginauyatan ang degree sa criminology. Nakapasar man ini sa board exam sang 2019 kag nangin topnotcher para sa Calabarzon region.
Subong nga adlaw, Abril 19, batunon sini ang Presidential Kampilan award kadungan sang 45th PNPA Commencement Exercises kun sa diin mismo si President Bongbong Marcos ang guest of honor.
Lakip man sa magatambong sa rites sa Camp General Mariano N. Castañeda sa Silang, Cavite amo sanday Interior and Local Government Secretary Benhur Abalos kag Philippine National Police chief Gen. Rommel Francisco Marbil.
Suno kay Cabasis, apisar nga isahanon siya nga anak, tuman ka budlay ang pag-eskwela rason nga nagtrabaho ini bilang photocopy center attendant kag nagbaton sang sweldo nga P25 kada oras.Nakabulig man sa iya galastuhan sa kolehiyo ang iya income sa pagbaligya sang siopao.
Sa pagsulod naman sa PNPA, mas mahapos na suno sa iya ang adjustments ilabi na bangud nangin officer man siya sang Reserve Officers Training Corps (ROTC) sa college.
Isa si Cabasis sa 41 ka mga babaye sa Layag-Diwa Class, apang nagapati siya sa kapasidad sang kaangay sini nga mga kababainhan: “We are not just women, we are women who can contribute to society.”
Siya kag ang 197 sa iya classmates ang magasulod sa PNP bilang lieutenant, 13 ang magasulod sa Bureau of Jail Management and Penology kag 12 sa Bureau of Fire Protection.#
