Ginkamasaan sang husto sang Germany ang Curacao, 7-1, sa ila hampang sa Group E sa Houston Stadium sa Houston, Texas, USA sa nagapadayon nga FIFA World Cup 2026.
Sais minutos pa lang sa pagsugod sang matchup, naka-score na para sa Germany ang ila midfielder nga si Felix Nmecha.
Ini ang bag-o nga record sang pinakamadasig nga goal sa FIFA World Cup 2026 — mas madasig sa “own goal” nga na-set anay sang Paraguay midfielder nga si Damián Bobadilla sa ila hampang batok sa USA.
Pag-abot sa ika-21 nga minuto, naka-goal para sa Curacao si Livano Comenencia. Ini ang maragtason kag una nga goal sang Curacao sa World Cup.
Pagkatapos sini, wala na nagpapugong ang Germany kag gin-sunod-sunod ang goals paagi kanday Nico Schlotterbeck, Kai Havertz (brace), Jamal Musiala, Nathaniel Brown, kag Deniz Undav.
Nagapang-82 sa ranking ang Curacao samtang Rank 10 naman ang Germany. Apat ka beses na sila nga nakadaog sang kampyonato sa World Cup — 1954, 1974, 1990, kag 2014.
Ini naman ang debut sang Curacao sa FIFA World Cup.
Sa bug-os nga maragtas sang World Cup, sila man ang pinakagamay nga nasyon (base sa area kag populasyon) nga naka-qualify nga makahampang sa amo nga tournament.
Ini nga gamay nga isla sa southern Caribbean Sea ang may 150,000 lamang nga populasyon kag 444 square kilometers nga kalaparon apang nalakip sila sa 48 teams nga maga-compete sa World Cup 2026.
Naka-qualify sila sa tournament paagi sa CONCACAF qualifying process sang nagpanguna sila sa Group B sa final round.
Nahibaluan nga magluwas sa Curacao kag Germany, naga-compete man sa group phase sa Group E ang Ecuador kag ang Ivory Coast. Ang tanan nila nga hampang ang patigayunon sa Estados Unidos.#
