Handa na ang mga Pinoy sa Puerto Rico nga i-singgitan ang suporta para kay Miss World Philippines Tracy Maureen Perez samtang ginatinguhaan sini nga makuha ang ikaduha nga Miss World Crown para sa Pilipinas.
Patigayunon ang Miss World 2021 Coronation Night sa San Juan, Puerto Rico ‘las otso subong nga aga, Philippine Standard Time.
Suno kay Bombo International Correspondent Phryne Cartera Elix direkta sa Puerto Rico, apisar tatlo ka bulan man ang delay bangud na-postpone ang pageant sang Disyembre 2021, mas safe na subong para sa mga kandidata kag audience bangud nagnubo na ang kaso sang Covid-19 kag halog na ang restrictions.
Ang ginahandaan na lang sang Filipino community amo ang pagwagayway sang hayahay sang Pilipinas kag mapat-od nga mabatyagan gid ini sang Cebuana beauty queen.
40 ka mga kandidata ang maga-compete para sa Miss World 2021 crown.
May pangalan na si Tracy sa amo nga pageant kasunod sang pagdaog sini sa 2nd round sang Head-To-Head challenge, kag nangin kabahin man sang Top 5 finalists sa Beauty With A Purpose challenge kun sa diin gin-highlight sini ang pag-empower sa single parents.
Kun madaog ni Tracy ini nga pageant, siya ang ikaduha nga Philippine representative nga mangin Miss World winner, sunod kay Megan Young nga ginkoronahan sang 2013.
