ILOILO CITY – Mas malimitahan ang gwa-sulod sang tawo kag mapat-od nga naka-isolate gid sang istrikto ang mga pumuluyo kun may surgical lockdown nga ipatuman sa mga barangay nga may mataas nga kaso sang COVID-19.
Ini ang pagpaathag sang COVID-19 team sang Iloilo City Government kaangot sa ipatuman nga surgical lockdown sa anum ka mga barangay sa syudad nga amo ang mga masunod: Barangay Calumpang sa Molo, Barangays Balabago kag Quintin Salas sa Jaro, Barangays Sto. Niño Sur kag Dulonan sa Arevalo, kag Barangay Calajunan sa Mandurriao.
Ini nga mga barangay ang lunsay may 20 ukon masobra pa ka active cases sang COVID-19 kag may local transmission.
Gina-validate pa ang numero sang kaso sa Tabuc Suba sa Jaro bangud una ini nga nahinambit sang COVID-19 team nga dal-on man sa surgical lockdown apang nagapanindugan man ang punong barangay nga 10 lang ang ila active cases subong.
Sa interview sang Bombo Radyo kay Jeck Conlu, COVID-19 spokesperson sang syudad, iya ginpahayag nga ginahulat na lang subong nga mapagwa na ang executive order ni Mayor Jerry Treñas.
May ihatag nga food packs sa mga apektado nga residente.
May yara man sang deployment sang police personnel nga amo ang magabantay sa sitio, zona, ukon anuman nga bahin sang barangay nga amo ang nakapaidalom sa containment measure.
Ipaidalom man sa swab test ang tanan nga close-contact sang COVID-19 positive ukon kun sin-o man nga dala sa contact tracing.
Kun may mga kinahanglanon ang mga pumuluyo, makabulig suno kay Conlu ang mga barangay officials kag iban pa nga barangay volunteers.
Sa executive order ni Mayor Treñas mahibaluan kun san-o mangin epektibo kag kun ano kadugay ang ipatuman nga surgical lockdown. ##
