ILOILO CITY- Ginpa-Bombo ni incumbent Punong Barangay Jofel Ladiet si former Punong Barangay Maricon Sumpio sang Alalasan, Lapuz bangud sa ginaalegar indi sini pagbayad sang malapit sa P700,000 nga water kag electricity bills sang barangay sang ini ang yara pa sa pwesto.
Sa interview sang Bombo Radyo kay Punong Barangay Jofel Ladiet, iya ginpahayag nga sang Nobyembre 2023 sa pagpungko pa lang niya bilang bag-o nga punong barangay, ginkakibot sini nga ginsukot siya sang Metro Pacific Iloilo Water sang bill nga nagalab-ot sa masobra P205,000.
Suno kay Ladiet, ang amo nga bill ang para sa water consumption humalin sang Enero 2019 tubtob Septyembre 2019 nga nagabili sang P187,000; kag Enero 2023 tubtob Oktubre 2023 nga nagabalor sang P17,000 kun sa diin si former Punong Barangay Maricon Sumpio pa ang ara sa posisyon.
Suno sa Punong Barangay, ang ginasukot naman sang MORE Electric and Power Corporation ang nagalab-ot sa malapit sa P400,000.
Natukiban man ni Ladiet nga may yara sang promissory note nga ginhatag si Sumpio nga bayaran niya ang electricity bill sang Disyembre 2023 apang wala ini natigayon.
Pahayag ni Ladiet, dismayado ini kun ngaa wala na-settle ang amo nga balaydan apisar nga may ginapain man nga budget ang Iloilo City Government para sa water kag electricity bills sang ila barangay.
Natingala man ang natungdan kun ngaa sang damlag lamang ini ginsukot apisar nga pila ka tuig na ang nakaligad nga wala ini mabayaran ni Sumpio.
Nagapanindugan naman si Ladiet nga indi ini magbayad sang amo kadako nga bill ilabi na nga ginpasalo lamang ini sa iya ni Sumpio nga ginpierde niya sa pagka-punong barangay sang nagligad nga eleksyon.
