Padayun ang panawagan sang pila ka mga progresibo nga grupo halin sa transport sector sa siudad sang Iloilo sa ginpatigayon nga people’s strike subong nga adlaw.
Sa interview sang Bombo Radyo kay Elmer Forro, Secretary General sang Bayan Panay kag Lead Convenor sang No to PUV Phaseout Coalition Panay, iya ginpahayag nga kinahanglan na gid sang mga driver kag operators sang ayuda halin sa gobyerno, apang nagpahayag man ini nga indi sa gihapon isa ka long term solution ang ayuda sa krisis sa gatong.
Suno sa iya nga makatililingala nga wala sa gihapon sang ‘best time’ para kay President Ferdinand Marcos Jr. agud suspendihon na ang excise tax sa mga produktong petrolyo.
Ginpahayag man ni Forro nga subong nga wala pa sang suspension sa excise tax, ang gobyerno kag cartel lamang ang nagabenepisyo sa sitwasyon, samtang nagaantos naman ang publiko ilabi na ang mga imol.
Dugang pa niya, posible nga magapatigayon sila liwat sang transport strike sa masunod nga semana bangud nga nagpalab-ot man ang pila ka drivers kag operators sa probinsya nga luyag nila nga mag-upod sa panawagan sa gobyerno.
