Gin-aprubahan sang Gabinete ni President Ferdinand Marcos Jr. ang ginaproponer nga 2027 National Expenditure Program (NEP).
Suno kay Presidential Communications Office Acting Secretary Dave Gomez, gintalakay kag gin-aprubahan sang Gabinete ang ginaduso nga budget nga ginpresentar sang Department of Budget and Management (DBM).
Apang wala anay naghatag sang dugang nga detalye ang ahensya agud indi maunahan ang opisyal nga pagsumiter sang Presidente sa ginaduso nga budget sa Kongreso.
Sa matandaan nga antes sini, ginrekomendar sang Development Budget Coordination Committee (DBCC) ang ginabulubanta P7.2 trilyon nga national budget para sa 2027.
Suno sa DBCC, ang ini nga ginaduso nga budget katumbas sang 21.7% sang gross domestic product (GDP) sang pungsod base sa ila pagrepaso sang medium-term macroeconomic assumptions para sa 2026 tubtob 2030.
Ang P7.2 trilyon nga budget ceiling para sa 2027 mas mataas sang 6% kompara sa P6.793 trilyon nga national budget subong nga tuig.
