Temporaryo nga magatal-os si Gen. Camilo Cascolan Deputy Chief for Administration sang Philippine National Police sa posisyon ni Gen. Archie Gamboa bilang Chief sang Philippine National Police.
Ini bangud padayon pa nga nagapa-ayo si Gamboa sa ospital matapos nga nag crash ang ginasakyan niya nga helicopter kahapon.
Suno kay Department of Interior and Local Government Secretary Eduardo Año si Cascolan ang temporaryo nga mangin officer-in-charge sang Philippine National Police tubtob nga makabalik na sa iya ‘full duty status’ si Gamboa.
Madumduman nga padulong na kun tani si Gamboa sa Calamba Laguna, sakay ang Bell 429 helicopter kaupod sanday MGen Joevic Ramos, MGen Mariel Magaway, BGen Bernard Banac kag ang aide de camp ni Gamboa nga si Capt Gayramara sang nakasab-it sa linya sang kuryente ang chopper rason kun ngaa nag crash ini.
Suno kay Año, magapatigayon sila sang pormal nga imbestigasyon sa nagluntad nga aksidente agud malikawan nga matabo ini liwat.
Samtang nagpangabay naman si Gamboa sa publiko nga untaton na ang pagpalapta sang mga pictures sang aksidente sa baylo nga buligan nalang sila nga ipangamuyo ang pagrecover sang iban pa nila nga kaupod nga yara subong sa kritikal nga kondisyon.
Nagpasalig naman ang natungdan, nga maayo na ang iya nga kondisyon kag handa na siya nga magbalik sa trabaho sa masunod nga semana.
