Natalana nga pasakaan sang kaso nga murder ang duha ka mga anay pulis kag ang iban pa nga suspek sa pagpatay sa Pampanga beauty queen nga si Geneva Lopez kag sa iya Israeli boyfriend nga si Yitshak Cohen.
Sa Camp Crame, mismo sanday Philippine National Police (PNP) chief Gen. Rommel Francisco Marbil kag Interior Secretary Benhur Abalos ang nagpakilala sa mastermind nga amo si Michael Guiang, pulis nga nag-absent without leave [permission] ukon nag-AWOL sang 2020, kag ang buddy sini kag kahimbon man sa krimen nga si Rommel Abuso nga nag-awol naman sang 2019.
Suno kay Marbil, pareho nga patrolman anay ang duha ka mga suspek.
Base sa imbestigasyon sang Criminal Investigation and Detection Group (CIDG), planado ang ginhimo sang mga anay pulis.
Ginpahayag ni CIDG director Maj. Gen. Leo Francisco nga naghulam sang kuwarta si Guiang kay Geneva apang wala na sang inugbayad. Bangud sini, gusto na lang ni Geneva nga angkunon ang duta nga gin-prenda ni Guiang, kag sa gin-arrange nga meet-up, si Abuso kuntani ang mapakilala nga buyer kag amo ang magabayad sang kuwarta nga ginhulam ni Guiang.
Apang sa adlaw sang ila pagkit-anay, didto na ginhimo ang ginplano nga brutal nga krimen kag ginsunog pa ang ila salakyan.
Ang prime witness nga si alias Jun-Jun ang involved man sa krimen, apang nakonsensya kag amo ang nagpalapit sa CIDG kag naghatag sang impormasyon rason nga natultulan ang mga bangkay sang mga biktima nga ginlubong sa Tarlac.
Sa subong ginatipon pa ang dugang nga mga ebidensya kag pahayag agud nga masuportahan ang kaso nga murder batok sa mga suspek.
Napaidalom na ang anay mga pulis sa kustodiya sang otoridad bangud sa separado nga kaso nga amo ang illegal possession of firearms and explosives, kag nagapadayon pa ang forensic cross-matching.
Wala pa ginakabig nga case closed ang Geneva Lopez case tubtub nga wala pa opisyal nga napasaka sa korte ang kaso batok sa mga suspek.
