Ginlaslasan ni Defense Secretary Gilberto Teodoro, Jr. ang spokesperson sang Chinese foreign affairs bangud sa pag-insulto kay President Ferdinand “Bongbong” Marcos, Jr.
Natabo ini sang nag-post si Marcos sa X sang iya pagpanginbulahan sa bag-o gid lamang na-eleher nga presidente sang Taiwan nga si Lai Ching-te: “On behalf of the Filipino people, I congratulate President-elect Lai Ching-te on his election as Taiwan’s next President.”
Nakita ini sang China rason nga ginpahayag ni Ministry of Foreign Affairs spokesperson Mao Ning nga ang pagpanginbulahan ni Marcos ang nagalapas sa One-China policy kag makabig nga “serious breach of the political commitments by the Philippines.”
Panugyan pa sini, dapat nga magbasa anay si Marcos sang mas madamo pa nga libro agud mahibaluan ang isyu sa tunga sang China kag Taiwan para nga husto man ang mangin konklusyon sini.
“We suggest that President Marcos read more books to properly understand the ins and outs of the Taiwan issue, so as to draw the right conclusions,” suno kay Mao.
Si Teodoro ang nagsabat sa sini nga pahayag sang China.
Gintawag sang tiglikom nga “gutter-level” ang ginpanghambal sang China bangud sa amo nga “insulto”.
“It is unfortunate that the PRC (People’s Republic of China) Ministry of Foreign Affairs spokesperson stooped to such low and gutter level talk – resorting to insulting our President and the Filipino nation, and further debasing herself, the Ministry, and Party she represents in the process,” kabahin sang statement.
Pahayag pa ni Teodoro, wala na siya nakibot sa pagpangbastos sang China bangud “brand” na nila ini kag gin-cite pa sini ang state-sanctioned “propaganda” kag “disinformation” nga ginahimo sang pihak nga nasyon.
Sa pagkamatuod suno sa tiglikom, ginalantaw sang Pilipinas nga may maabot nga dugang nga kaangay sini nga komento halin sa China.
“It is unfortunate, but I am, myself, unsurprised. The spokesperson’s statements were ‘on brand.’ We, and the world, should not expect more,” dugang sini.
Sa bahin sang Department of Foreign Affairs (DFA), gin-athag sini nga nagapabilin ang commitment sang Pilipinas sa One China Policy kag ginklaro man sini nga ginpanginbulahan gid lamang ni Marcos ang Taiwan bangud sa madinalag-on nga democratic process sa eleksyon.
Nahibaluan nga ginakilala sang Pilipinas ang People’s Republic of China bilang nagaisahanon nga legal government sang China samtang ang Taiwan naman ang integral part sang Chinese territory.#
