ILOILO – Ginahalad ni Miss Iloilo Universe 2020 ang iya nangin kadalag an para sa mga kasimanwa niya Balasan nga nabiktima sang bagyong Ursula sang damlag lang.
Sa interview sang Bombo Radyo kay Rabiya Mateo, 23, sang Balasan, Iloilo kag gin koronahan nga Miss Iloilo Universe 2020 iya ginpahayag nga nangin inspirasyon niya ang gin agyan sang iya mga kasimanwa sang naglaslas ang bagyong Ursula sa ila nga banwa.
Suno kay Mateo, hugot nga pagtuo ang iya ginkaptan agud makuha ang korona sa Miss Iloilo 2020 lakip man ang tanan nga naga suporta sa iya ilabi na ang iya pamilya.
Dugan sang natungdan, bilang labing una nga Miss Iloilo Universe siya ang magpanguna sa pagsakdag sang maragtas sang Iloilo kag ipalapnag ini sa bilog nga kalibutan.
Samtang indi naman matakos ang kasadya sang iloy ni Miss Iloilo Universe Rabiya Mateo bangud sa nangin kadalag an sang iya nga bata.
Suno kay Christine Mateo iloy ni Rabiya, nangin sulit ang tanan nga sakripisyo kag pagpanikasog nila ilabi na sang iya nga bata agud makuha ang korona.
Tuman man sila nga nagapasalamat sa tanan nga nagsuporta sa iya nga bata humali sang una.
