Gobyerno, nagpasalig nga indi pagpabay-an ang ginpanglay-off nga 300 ka mga empleyado sang airline company bangud sa naangkon nga kapierdehan sa kita resulta sang travel ban angot sa covid-19

Nagpasalig si Cabinet Secretary Karlo Nograles nga makabaton sang bulig gikan sa gobyerno ang 300 ka mga empleyado sang Philippine Airlines nga ginpahalin sa trabaho bangud sa epekto sang Coronavirus Disease 19 (COVID-19).

Suno kay Nograles, mahimo hatagan sang libre nga training sa Technical Education and Skills Development Authority ang mga nadulaan sang trabaho nga empleyado sang airline company.

Nakig-angot na si Nograles sa Department of Interior and Local Government agud mahatagan sang panibag-o nga trabaho ang mga naapektuhan sang nasambit nga outbreak.

Bangud sa paglapta sang COVID-19, ginpauntat ang flights padulong sa China, Hong kong kag Macau santo sa mandu ni Presidente Rodrigo Duterte.