ILOILO CITY- Nagalaum si Iloilo Governor Arthur Defensor Jr. nga mangin drug- cleared na ang nabilin nga 25 ka mga barangays halin sa pito ka mga kabanwahanan sa probinsya sang Iloilo.
Sa interview sang Bombo Radyo kay Gov. Defensor, iya ginpahayag nga padayon nga gina-validate sang Philippine Drug Enforcement Agency ang mga barangay kun may mga nabilin pa nga mga drug personalities.
Suno sa gobernador, may mga barangay man nga indi fully functional ang mga drug councils sa diin dapat nga hatagan ini sang igtalupangod.
Pahayag ni Gov. Defensor, may posibilidad nga nagbalik gid man ang iligal nga droga kag ini ang ginatinguhaan sang Iloilo Police Provincial Office nga mapapas.
Santu sa guidelines sang Philippine Drug Enforcement Agency , antes nga madeklara nga drug- cleared ang isa ka barangay, kinahanglan nga i-validate anay sang oversight committee ang non-availability sang iligal nga droga sa lugar, absence sang drug transit activity, kag absence sang drug laboratories kag chemical warehouses, absence sang marijuana cultivation sites, kag absence sang drug dens, drug pushers, kag drug users.
Ang oversight committee ang ginalakipan sang Philippine Drug Enforcement Agency bilang chair kag representatives halin sa Police Regional Office 6, Department of Interior and Local Government, kag Department of Health.
